प्रचण्डप्रति विश्वासको मत वृद्धि हुँदै

काठमाडौं । प्रधानमन्त्री एवं नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’प्रति विश्वासको मत वृद्धि हुने भएको छ । संसद्बाट आज सोमबार विश्वासको मत लिने तयारीमा रहेका दाहालको पक्षमा गठबन्धनमा आबद्ध दलहरूबाहेक राष्ट्रिय स्वतन्त्र पार्टी (रास्वपा) ले समेत मत दिने निर्णय गरेपछि विश्वासको मत संख्या वृद्धि हुने पक्का भएको हो ।

प्रचण्ड नेतृत्वको सरकारबाट बाहिरिएको (रास्वपा)ले समेत प्रधानमन्त्रीको पक्षमा मतदान गर्ने भएपछि प्रचण्डले सहज विश्वास प्राप्त गर्ने अवस्थामा पुग्नुभएको नेताहरूले बताएका छन् । गत पुस २६ मा विश्वासको मत लिँदा पनि गठबन्धन भत्काएर हिँडेका प्रचण्डलाई नेपाली कांग्रेससहितको विश्वास पाएको थियो । रास्वपाले अहिले सरकार छाडे पनि भविष्यमा यही सरकारमा जान सक्ने बाटो कायम राख्दै विश्वासको मत दिने निर्णय गरेको रास्वपाका एक नेताले बताए । यद्यपि, रास्वपाले सरकारमा जाने विषयमा केही बोलेका छैन । प्रधानमन्त्री र गठबन्धनका मुख्य दल नेपाली कांग्रेससहितले सरकारमा राख्न चाहे रास्वपा अहिले नै सरकारमा जाने आन्तरिक तयारी भने गरिनै रहेको छ । यसैकारण सरकारमा सहभागी भएको करिब डेढ महिनामै सरकार छाडेको उक्त दलले प्रचण्डलाई मतदान गर्ने निर्णय गरेको राजनीतिक वृत्तमा चर्चा छ ।