कसरी मारिए हमासका शीर्ष कमाण्डर ?

हमासले आफ्ना सैन्य शाखाका शीर्ष कमाण्डर इज अद-दिन अल-हदाद इजरायली हवाई आक्रमणमा मारिएको पुष्टि गरेको छ ।

हमासका एक अधिकारीले बीबीसीलाई दिएको जानकारीअनुसार शुक्रबार गाजा सिटीमा भएको आक्रमणमा हदादको मृत्यु भएको हो ।

इजरायली प्रधानमन्त्री बेन्जामिन नेतान्याहु र रक्षामन्त्री इजरायल काट्जले एक संयुक्त विज्ञप्ति जारी गर्दै हदादलाई 'अक्टोबर ७ को नरसंहारका मुख्य योजनाकार' मध्ये एक भएको बताएका छन् ।

इजरायलका अनुसार हदाद हजारौँ इजरायली नागरिक र सैनिकहरूको हत्या तथा अपहरणमा जिम्मेवार थिए ।

प्रत्यक्षदर्शीहरूका अनुसार गाजा सिटीको केन्द्रमा रहेको 'अल-मुताज' नामक आवासीय भवनमा दुई फरक दिशाबाट एकैसाथ तीनवटा मिसाइल प्रहार गरिएको थियो । उक्त आक्रमणपछि भवनमा ठूलो आगलागी भएको थियो । भवनबाट गम्भीर घाइते अवस्थामा हदादलाई निकालेर एउटा कारमा हाली लैजाँदै गर्दा इजरायलले पुनः अर्को आक्रमण गरेको थियो ।

भवनभन्दा करिब डेढ किलोमिटर टाढा भएको उक्त दोस्रो आक्रमणमा कारमा सवार हदादसहित अन्य तीन जनाको पनि मृत्यु भएको छ । उद्धार टोलीहरूले घटनास्थलबाट शव र घाइतेहरूलाई बाहिर निकाल्न निकै कठिनाइ भोग्नुपरेको बताइएको छ ।

गाजामा गत अक्टोबर १० देखि युद्धविराम लागू भए पनि इजरायलले लगातार हवाई आक्रमणहरू जारी राखेको छ । हमासले इजरायलमाथि युद्धविरामको सर्त उल्लंघन गरेको र नागरिक आवासमा हमला गरेको आरोप लगाएको छ । अर्कोतर्फ, इजरायली सरकारले हमासका लडाकुहरूलाई लक्षित गर्ने आफ्नो अभियान नरोकिने स्पष्ट पारेको छ । नेतान्याहु र काट्जले हदादले हमासलाई निशस्त्रीकरण गर्ने अमेरिकी प्रस्ताव अस्वीकार गरेकाले उनीविरुद्ध निर्णायक कारबाही गरिएको बताएका छन् ।

सन् २०२३ अक्टोबर ७ मा हमासले इजरायलमा गरेको आक्रमणबाट सुरु भएको यस युद्धमा हालसम्म ७२ हजार ७ सय ४४ भन्दा बढी मानिसको मृत्यु भइसकेको गाजाको स्वास्थ्य मन्त्रालयले जनाएको छ ।