अख्तियारले ठूला भ्रष्टाचार काण्डका फाइल अघि बढाउन लाग्दा सर्वोच्चमा देखिएको हतारो

अख्तियार दुरुपयोग अनुसन्धान आयोगले पोखरा क्षेत्रीय अन्तर्राष्ट्रिय विमानस्थललगायत केही ठूला भ्रष्टाचार काण्डमा अनुसन्धान सकेर मुद्दा चलाउनै लागेपछि सर्वोच्च अदालतमा अस्वाभाविक हतारो देखिएको छ । पोखरा विमानस्थलको मुद्दा दायर गर्दा नेपाल नागरिक उड्डयन प्राधिकरणका महानिर्देशक प्रदीप अधिकारीलगायत केही ‘ठूला माछा’ कानुनी फन्दामा पर्नेछन् र भ्रष्टाचार मुद्दाका कारण तत्कालै निलम्बनमा पनि जानेछन् ।

सूचना प्रविधि क्षेत्रको भ्रष्टाचारमा सुनील पौडेल र विकल पौडेलले जसरी भ्रष्टाचार र कमिसनको जालो सिंगापुरदेखि अमेरिकासम्म फैलाएको पाइएको थियो, प्रदीप अधिकारी उड्डयन क्षेत्रमा पनि त्यस्तै पात्र रहेको अख्तियारको निष्कर्ष छ । पोखरा विमानस्थलको मुद्दा अदालत पुगेलगत्तै अख्तियारले उनको सम्पत्तिसम्बन्धी मुद्दा अघि बढाउनेछ ।