मच्छिन्द्र जोगियो, जावलाखेलको अग्रता खारेज

काठमाडौं । जारी शहिद स्मारक ए डिभिजन लिग निकै रोमाञ्चक मोडमा पुगेको छ । बिहीबार भएका खेलमा तल रहेको टोलीले शानदार खेल देखाएपछि लिगमा रोमाञ्चक भइरहेको छ । मच्छिन्द्र क्लबलाई रेलिगेसन जोनमा रहेको टोली फ्रेन्ड्स क्लबले दरो चुनौती दिएको थियो । अर्को खेलमा जावलाखेललाई तल्लो क्रमको स्थानमा रहेको एनआरटीले रोक्यो ।

दशरथ रंगशालामा भएको पहिलो खेलमा फ्रेन्ड्सले दुई पटक अग्रता बनाएर मच्छिन्द्रलाई हार चखाउन तयार भइसकेको थियो । तर, ओलावाले आफिजले दुबै पटक गोल फर्काएर मच्छिन्द्रलाई २–२ नतिजामा राखेर हारबाट जोगाए । खेलको ६७ औं मिनेटमा प्रकाश बुढाथोकीले गोल गर्दै फ्रेन्ड्सलाई १–० को अग्रतामा राखे । तर, यो अग्रता केही मिनेटको लागि मात्रै सावित भयो । आफिजले चार मिनेटपछि गोल गरेर खेल १–१ बराबरीमा ल्याए ।