विदेशी मुद्रा सञ्चिति ३७ खर्ब नाघ्यो, १९ महिनाभन्दा बढीको वस्तु तथा सेवा आयात धान्न पर्याप्त

काठमाडौँ । देशको ढुकुटीमा रहेको विदेशी विनिमय सञ्चितिले नयाँ रेकर्ड कायम गरेको छ । नेपाल राष्ट्र बैंकले सार्वजनिक गरेको पछिल्लो दश महिनाको तथ्याङ्कअनुसार कुल विदेशी विनिमय सञ्चिति ३८.३ प्रतिशतले वृद्धि भई ३७ खर्ब ४ अर्ब ५५ करोड रुपैयाँ पुगेको छ । गत असार मसान्तमा यस्तो सञ्चिति २६ खर्ब ७७ अर्ब ६८ करोड रुपैयाँ मात्र रहेको थियो।

अमेरिकी डलरमा हेर्दा पनि सञ्चिति २४.० प्रतिशतले बढेर २४ अर्ब १९ करोड डलर पुगेको छ। कुल सञ्चितिमध्ये नेपाल राष्ट्र बैंकमा ३२ खर्ब ९८ अर्ब ३८ करोड र अन्य बैंक तथा वित्तीय संस्थाहरूमा ४ खर्ब ६ अर्ब १७ करोड रुपैयाँ रहेको छ । कुल सञ्चितिमा भारतीय मुद्राको अंश २०.६ प्रतिशत रहेको छ।