मानव बेचबिखन रोक्न समयसापेक्ष कानुन र प्रभावकारी संयन्त्र आवश्यक : सांसद भट्टराई

राष्ट्रिय स्वतन्त्र पार्टी (रास्वपा) की सांसद श्रृष्टी भट्टराईले बदलिँदो समय र अपराधको स्वरूपअनुसार कानुनलाई अझ प्रभावकारी बनाउनुपर्ने बताएकी छिन्।

मानव बेचबिखन तथा ओसारपसार (नियन्त्रण) पहिलो संशोधन विधेयक, २०८३ माथिको सामान्य छलफलमा भाग लिँदै उनले भनिन्, ‘यो सामान्य विधेयक नभई हाम्रा नागरिकको स्वतन्त्रता, सम्मान, सुरक्षा र राज्यप्रतिको विश्वाससँग जोडिएको विषय हो।’ मानव बेचबिखनलाई केवल अपराध नियन्त्रण गर्ने कानुनका रूपमा मात्र हेर्न नहुने उल्लेख गर्दै उनले यसलाई पीडितको संरक्षण र अपराधीमाथि प्रभावकारी कारबाही गर्ने बलियो माध्यम बनाउनुपर्नेमा जोड दिइन्।