काभ्रे अदालतद्वारा ९२ प्रतिशत मुद्दा फर्छ्यौट

काभ्रेपलाञ्चोक । जिल्ला अदालतद्वारा बितेको आर्थिक वर्ष २०८१/८२ मा ९१ दशमलव ७६ प्रतिशत मुद्दा फर्छ्यौट गरेको छ । उक्त आवमा अदालतबाट दुई हजार ३२० मुद्दा फर्छ्यौट लक्ष्य राखिएकामा दुई हजार १२९ अर्थात् ९१ दशमलव ७६ प्रतिशत मुद्दा फर्छ्यौट भएको जनाइएको हो ।

सो अवधिमा एक हजार ३५८ पुरानो जिम्मेवारी सरेर आएका मुद्दा थिए । तीसँगै गत आवमा दर्ता भएका दुई हजार २३३ गरी कुल तीन हजार ५९१ मुद्दा रहेकामा दुई हजार १२९ फर्छ्यौट भएको र एक हजार ४६२ मुद्दा फर्छ्यौट हुन बाँकी रहेको कार्यालयका स्रेस्तेदार कर्णबहादुर राईले जानकारी दिए । उनका अनुसार अदालतमा दर्ता भएका मुद्दामध्ये सबैभन्दा बढी सम्बन्ध विच्छेदका छन् । त्यसमा ६३७ सम्बन्ध विच्छेद, चेक अनादरका २४५, अंश चलनका ३३१, भरण पोषण ९८, जबर्जस्तीकरणीका ४४ र अन्य ८७८ रहेका छन् ।