एमाले कार्यदल बैठक: सुझाव सङ्कलन गर्ने

काठमाडौँ। नेपाल कम्युनिष्ट पार्टी (एमाले) ले पार्टीको सङ्गठन सुदृढीकरण र भावी कार्यदिशा बनाउनका लागि देशव्यापी रूपमा सुझाव सङ्कलन गर्ने निर्णय गरेको छ ।

ललितपुर, च्यासलस्थित पार्टी मुख्यालयमा आज उपाध्यक्ष रामबहादुर थापाको संयोजकत्वमा गठित निर्वाचन समीक्षा तथा पुनःगठन कार्यदलले देशव्यापी सुझाव सङ्कलन कार्यक्रम सञ्चालन गर्ने निर्णय गरेको एमाले प्रचार विभाग प्रमुख नीरज आचार्यले जानकारी दिनुभयो ।

उहाँले बैठकले पार्टी संरचना थप सुदृढ र प्रभावकारी बनाउन प्रदेशदेखि केन्द्र तहसम्म सुझाव सङ्कलन तथा छलफल कार्यक्रम सञ्चालन गर्ने भएको बताउनुभयो । उहाँका अनुसार राजधानीसहित आठ प्रदेश कमिटी, जनसङ्गठन, सम्पर्क समन्वय र विभाग प्रमुख तथा निकायका पदाधिकारीसँग सङ्गठन सुदृढीकरण र पार्टीको भावी कार्यदिशा बनाउन सुझाव सङ्कलन गर्न थालिएको हो ।

प्रदेशस्तरीय भेलामा सम्बन्धित क्षेत्रका केन्द्रीय सदस्य, प्रदेश पदाधिकारी तथा जिल्ला तहका पदाधिकारीहरूको सहभागिता रहनेछ । कार्यक्रमको समन्वय सम्बन्धित प्रदेश इञ्चार्जले गर्ने निर्णय गरिएको छ ।

बैठकले कार्यदलको सदस्य–सचिवको जिम्मेवारी शङ्कर पोखरेललाई दिने निर्णय गरेको प्रचार विभाग प्रमुख आचार्यले जानकारी दिनुभयो । बैठकमा पार्टी अध्यक्ष ओलीसहित उपाध्यक्ष विष्णुप्रसाद पौडेल, उपाध्यक्ष पृथ्वीसुब्बा गुरुङ, सचिव पद्मा अर्याललगायत रहनुभएको थियो । रासस

#एमाले कार्यदल

न्यूजपोलार

२६ जेष्ठ २०८३, मंगलवार १९:१४