गेटाको एमबीबीएस कार्यक्रम र आर्मी मेडिकल कलेजको बढेको एमबीबीएस सिट खारेज गर्न डा. गोविन्द केसीको माग

काठमाडौं- चिकित्सा शिक्षा आयोगले सहिद दशरथ चन्द स्वास्थ्य विज्ञान विश्वविद्यालय (गेटा)को एमबीबीएस कार्यक्रम र नेपाली आर्मी मेडिकल कलेजलगायतका शिक्षण संस्थामा एमबीबीएस कार्यक्रम सञ्चालन तथा सिट वृद्धि गर्न दिएको निर्णय खारेज गर्न डा. गोविन्द केसीले माग गरेका छन्।

सोमबार विज्ञप्ति जारी गर्दै डा. केसीले न्यूनतम पूर्वाधार, आवश्यक जनशक्ति र कानुनी मापदण्ड पूरा नगरी गेटा विश्वविद्यालयमा एमबीबीएस तथा नर्सिङ कार्यक्रम सञ्चालन गर्न अनुमति दिइएको भन्दै आपत्ति जनाएका हुन्। उनले आवश्यक मापदण्ड पूरा नगरेका शिक्षण संस्थामा सिट वृद्धि गर्ने निर्णयसमेत तत्काल बदर गर्न माग गरेका छन्।