अबोध पशुप्राणीमाथि हुने क्रूरताविरुद्ध एक्लै लडिरहेकी आशिका तामाङ

दसैंको माहौल छ । मान्छेहरू मूल घर फर्कँदैछन् । जमघट, भलाकुसारीसँगै मिठोमसिनो खाने क्रम सुरु भएको छ । तर, यही माहौलमा आशिका तामाङको धपेडी फरक छ । उनी दसैंकै छेकमा अबोध र आवाजविहीन प्राणीमाथि हुने अत्याचारविरुद्ध एक्लै लडिरहेकी छिन्, एक्लै बोलिरहेकी छिन् ।

राँगा, भैंसी, खसीबोका आदिलाई ढुवानी गर्दा अपनाइने अत्यन्तै क्रूर तरिकाविरुद्ध उनी आवाज उठाइरहेकी छिन् । ट्याक्सीको डिकीमा निर्जीव वस्तु जसरी कोचेर लगिएका वा गाडीको छतमा अत्यन्तै पीडा दिएर राखिएका खसीबोकाको उद्धारमा उनी खटिएकी छिन् । तिनीहरूलाई ढुवानी गर्दा त्यति पीडा नदिन भन्दै उनी हारगुहार गरिरहेकी छिन् ।