कांग्रेस–एमाले जुध्दै, जसपा अनुकूल क्षणको पर्खाइमा

काठमाडौँ । मधेश प्रदेशमा नेपाली कांग्रेसका कृष्णप्रसाद यादव नेतृत्वको सरकारबाट नेकपा (एमाले) बाहिरिएसँगै नयाँ सत्ता समीकरणको कसरत शुरू भएको छ । सरकार अल्पमतमा पर्ने अवस्था बने पनि जनता समाजवादी पार्टी (जसपा) नेपाल भने तत्काल सरकार गठनको दौडमा देखिएको छैन । तर, कांग्रेस र एमालेबीचको सत्ता संघर्षले आफूलाई मुख्यमन्त्रीको कुर्सीसम्म पुर्‍याउन सक्ने सम्भावना आकलन गर्दै जसपा परिस्थितिको प्रतीक्षामा छ ।

दशैँको माहोलमा मधेशको राजनीतिमा देखिएको यो फेरबदलले तत्कालै नयाँ सरकार गठनको बाटो खोल्नेभन्दा पनि दशैँपछि सत्ता समीकरण कता मोडिन्छ भन्ने चासो बढाएको छ । अरू दलहरू सरकार जोगाउने वा नयाँ समीकरण बनाउने हिसाबकिताबमा व्यस्त हुँदा जसपा भने आफू अनुकूल परिस्थिति निर्माण हुने प्रतीक्षामा देखिन्छ ।