एनआरएनए महासचिवमा रामशरण सिम्खडाले उम्मेदवारी दिने

काठमाडौँ । गैरआवासीय नेपाली संघ (एनआरएनए) का उपाध्यक्ष रामशरण सिम्खडा (बेलायत) ले संस्थाको १२ औँ महाधिवेशनमा महासचिव पदमा उम्मेदवारी दिने घोषणा गरेका छन् । एनआरएनएको १२ औँ महाधिवेशन आगामी फागुन ३० देखि चैत २ गतेसम्म काठमाडौँमा हुँदैछ ।

संस्थाको पुनर्संरचना, यसलाई सबैको साझा बनाउने तथा विगतका टुटफुटका कारणले गुमेको प्रतिष्ठा फर्काउने भिजनका साथ उम्मेदवारी दिन लागेको उनले बताएका छन् । केही महिनाअघि मात्रै दुई समूहमा विभाजित एनआरएनए एकताबद्ध भएर महाधिवेशन गर्ने समझदारी भएको थियो, सोही समझदारीअनुरूप महासचिवका रूपमा प्रभावकारी काम गर्ने योजनासहित आफू चुनावी मैदानमा होमिन लागेको उनको भनाइ छ ।