सवारी कर्जाको एल‍.टि.भि. रेसियो ८० प्रतिशत कायम गर्न नाइमाको आग्रह

काठमाडौँ। नेपाल अटोमोबाइल इम्पोर्टर्स एण्ड म्यानुफ्याक्चरर्स एसोसिएसन (नाइमा) ले सबै प्रकारका सवारी साधनमा हायर–पर्चेज कर्जाको ऋण–मूल्य अनुपात एल‍.टि.भि. रेसियो हालको ६० प्रतिशतबाट वृद्धि गरी अधिकतम ८० प्रतिशत कायम गर्न नेपाल राष्ट्र बैंक र अर्थ मन्त्रालयसमक्ष औपचारिक अनुरोध गरेको छ ।

नाइमाका अनुसार, हालको ६० प्रतिशतको सीमा अटोमोबाइल बजारमा देखिएको सुस्तताको प्रमुख कारण हो । यसले उच्च प्रारम्भिक भुक्तानीको आवश्यकता सिर्जना गरी उपभोक्तालाई सवारी साधन खरिद गर्न असमर्थ बनाएको छ, जसले बिक्रीमा कमी ल्याउनुका साथै समग्र आर्थिक गतिविधि र राजस्व संकलनमा प्रत्यक्ष प्रभाव पारेको छ । अटोमोबाइल क्षेत्र सरकारको राजस्वमा उल्लेखनीय योगदान पुर्‍याउने एक प्रमुख क्षेत्र हो ।