उपत्यका पूर्वाधार विकासका लागि पाँच सय अर्बका योजना

काठमाडौं उपत्यकाको पूर्वाधार विकास तथा सार्वजनिक यातायात सेवामा सुधार गर्ने उद्देश्यबाट सरकारले ५०० अर्बभन्दा बढी रुपैयाँ खर्च लाग्ने गरी ३५ बुँदे महत्वाकांक्षी गुरुयोजना तयार गरेको छ। उक्त गुरुयोजना कार्यान्वयन भए उपत्यकामा मेट्रो रेल, दुई तले सुरुङमार्ग, ठाउँठाउँमा एलिभेटेड रोड (उचाइमा रहने सडक फ्लाइओभर), थुप्रै ठाउँमा नयाँ पुल, कोरिडोर सुधारलगायत ठुल्ठुला संरचना दर्जनौं ठाउँमा निर्माण गरिने छ।

जापानी सहयोग नियोग जाइकाको सहयोगमा पूर्वाधार विकास मन्त्रालयले गुरुयोजना तयार गरेको हो। मन्त्रालयका तर्फबाट यसको अगुवाइ सहसचिव तथा सडक विभागका पूर्वमहानिर्देशक सुशीलबाबु ढकालले गरिरहेका छन्। नेपाल सरकारले यस गुरुयोजनालाई स्वीकृत गरेपछि कार्यान्वयना जाने उनले बताए। उनका अनुसार हाल गुरुयोजनाको प्रारम्भिक सम्भाव्यता अध्ययन भइरहेको छ। यस योजनाबारे मन्त्रालयले सार्वजनिक सूचना नै जारी गरेर सर्वसाधारणबाट सुझाव माग्ने तयारी गरिरहेको छ।