केन्द्रसहित सातै प्रदेशमा एमाले प्रतिपक्षी 

कोसी प्रदेशमा सरकारको नेतृत्व गुमाएसँगै संघीय संसद्को दोस्रो ठूलो दल एमाले केन्द्रसहित सातैप्रदेशमा प्रमुख प्रतिपक्षी बेन्चमा पुगेको छ । कोसीमा मुख्यमन्त्री हिक्मत कार्कीले शुक्रबार विश्वासको मत लिन असफल भएसँगै एमाले सातवटै प्रदेशमा सत्ताबाहिर भएको हो ।

गत १५ फागुनबाट केन्द्र सरकारबाट सुरु भएको सरकारबाट बाहिरिने चारमहिने शृंखला कोसीमा गएर टुंगिएको छ । राष्ट्रपति निर्वाचनको पूर्वसन्ध्यामा अचानक समीकरण बदलिएपछि सत्ता राजनीतिमा एमालेले ठूलो धक्का खाएको हो । मधेसमा जसपा नेतृत्वको सरकारलाई विश्वासको मत दिए पनि एमालेले कोसीमा निर्णायक मानिएको जसपाको मत पाएन र आफ्नो नेतृत्वको सरकार जोगाउन सकेन ।