जनस्वास्थ्यमा ध्यान देऊ

जनस्वास्थ्यको पहुँच ग्रामीण क्षेत्रसम्म पु¥याउने उद्देश्यले धुलिखेल अस्पतालले टेलिमेडिसिन सेवा शुरु गरेको छ । नेपाल सरकारको स्वास्थ्य सेवा प्रवाहलाई आम नागरिकको पहुँचमा पु¥याउन संविधानमा व्यवस्था भएअनुरुप गर्ने उद्देश्यले यो सेवा शुरु गरिएको हो । यसरी सेवा पाउने जानकारीले आम नागरिकमा खुशी थपेको छ । यो सेवाले स्थानीय तहमै बसेर विशेषज्ञ सेवा पाउन सक्ने प्रावधानको शुरु गर्नु सकारात्मक तथा प्रशंसनीय कार्य हो । यस्तै नेपाल सरकार स्वास्थ्य तथा जनसंख्या मन्त्रालयले जनस्वास्थ्यलाई सहज र सरल बनाउने उद्देश्यका साथ यही श्रावण १ गतेबाट नेपालकै जेठो वीर अस्पतालको ओपीडी सेवा बिहान ८ बजेदेखि नै सुचारु गरेर नेपाली नागरिकलाई सहज र सरलरुपमा स्वास्थ्य सेवा प्रवाहलाई प्राथमिकतामा राखेको छ । दैनिक ३ हजारको हाराहारीमा नयाँ बिरामीले ओपीडी सेवा लिइरहेका छन् । अस्पतालमा लामो लाइन हुनुका साथै बिरामीले समयमै पालो नपाउँदा कठिनाइ भएको अवस्थामा स्वास्थ्य मन्त्रालयले वीर अस्पताललाई सेवा सर्वसुलभ बनाउन दिएको निर्देशनको अस्पताल तथा न्याम्सले सहजरुपमा पालना गर्दै छ । बिहान ७ बजे नै ओपीडी टिकट खुल्ला गर्नुका साथै ८ बजेदेखि ओपीडी सेवा सुचारु गर्नुले बिरामीलाई सहज हुने विश्वास लिइएको छ ।

कानुनमा १० प्रतिशत बेड विपन्न, असहाय, बेवारिसे नागरिकका लागि छुट्याउनुपर्ने उल्लेख छ । अधिकांश अस्पतालले हालसम्म लागू नगरेको अवस्थामा स्वास्थ्य तथा जनसंख्या मन्त्रालयले पहिलो चरणमा सरकारी अस्पतालमा लागू गरेको छ । यो क्रमले स्वास्थ्य बिमादेखि निःशुल्क औषधि उपलब्ध गराउनुपर्ने विषयलाई लागू गर्ने निर्णयले नागरिकमा आशा जगाएको छ । सरकारले बोलेका कुरा व्यावहारिक बनोस्, निराशामा परिणत नहोस् ।