महँगीको चपेटामा भान्छा: असारमा खाद्यान्न र तरकारीको मूल्य आकाशियो

काठमाडौँ। वाणिज्य, आपूर्ति तथा उपभोक्ता संरक्षण विभागले हालै सार्वजनिक गरेको ‘असार महिनाको मूल्य विश्लेषण प्रतिवेदन’ ले बजारमा उपभोग्य वस्तुको मूल्यमा अस्वाभाविक र तीव्र वृद्धि भएको देखाएको छ। विभागले काठमाडौँ उपत्यकासहित विराटनगर, वीरगञ्ज, भैरहवा, नेपालगञ्ज र धनगढी गरी ६ वटा मुख्य सहरको बजार मूल्य विश्लेषण गर्दै गत वैशाख महिनाको तुलनामा असारमा खाद्यान्नदेखि तरकारीसम्मको मूल्य अत्यधिक बढेको र यसले सर्वसाधारणको भान्छा निकै महँगो बनाएको निष्कर्ष निकालेको छ।

प्रतिवेदनअनुसार विशेषगरी तरकारी बजारमा देखिएको मूल्यको उतारचढाव डरलाग्दो छ। असार महिनामा सानो स्थानीय गोलभेँडाको मूल्यमा २ सय ५३ प्रतिशतको भारी वृद्धि देखिएको छ भने वैशाखमा सस्तो रहेको गोलभेँडा असारसम्म आइपुग्दा प्रतिकिलो ६० रुपैयाँ नाघेको छ। त्यसैगरी, बुलेट खुर्सानीको मूल्यमा १ सय ७९ प्रतिशत र दशहरी आँपको मूल्यमा १ सय ६० प्रतिशतको ठूलो वृद्धि भएको छ।