विश्वकपमा पेनाल्टी सुटआउटः जसले उपाधि चुमे

लन्डन । पेनाल्टी सुटआउटमा गोल गर्न नसक्नेहरुको बढी आलोचना हुन्छ भने गोल रोक्ने गोलरक्षकहरुको बढी तारिफ । सायद त्यसैले भनिन्छ, पेनाल्टी सुटआउटमा जो भाग्यमानी हुन्छ, उसैले जीत हात पार्छ । विश्वकपमा नकआउट चरण सुरु भएपछि विजेता छुट्याउन टाइब्रेकरका रुपमा पेनाल्टी सुटआउटको सहारा लिइन्छ ।

निर्धारित ९० मिनेट र थपिएको ३० मिनेटको अतिरिक्त समयको खेल पनि बराबरीमा सकिए पेनाल्टी सुटआउटबाट नतिजा निकालिन्छ । चार वर्षअघि रुसमा सम्पन्न पछिल्लो विश्वकपमा चारवटा पेनाल्टी सुटआउट भएका थिए, तीनवटा प्रि-क्वार्टरफाइनल र एउटा क्वार्टरफाइनलमा । रुसले स्पेनलाई, क्रोएसियाले डेनमार्कलाई र इङ्ल्यान्डले कोलम्बियालाई पेनाल्टी सुटआउटमा हराएर क्वार्टरफाइनलमा पुगेका थिए । सेमिफाइनल पुग्ने क्रममा क्रोएसियाले रुसलाई पेनाल्टी सुटआउटमै पराजित गरेको थियो ।