दुवाकोटको १६ रोपनी सार्वजनिक जग्गा भू-माफियाको कब्जामा

भक्तपुरको चाँगुनारायण नगरपालिका–१ दुवाकोटस्थित सार्वजनिक जग्गा गैरकानुनी रूपमा व्यक्तिको नाममा दर्ता गरिएको भन्दै उक्त दर्ता बदर गरी पुनः सरकारी नाममा कायम गर्न माग गरिएको छ। साविक दुवाकोट गाउँ विकास समिति वडा नं. ८ (ख) स्थित १६ रोपनी सार्वजनिक जग्गा व्यक्तिको नाममा दर्ता गरिएको पाइएको भन्दै भूमि प्रशासन कार्यालय (मालपोत कार्यालय) भक्तपुरमा निवेदन दर्ता भएको छ।

‘सत्य र न्यायको खोजी अभियान’ले मंगलबार भूमि प्रशासन कार्यालय कमलविनायक, भक्तपुरमा मागपत्र पेस गरेको हो। दर्जनौँ संख्यामा आएका टोलीले कार्यालय प्रमुख अर्जुन राईसमक्ष सो मागपत्र पेस गरेका हुन्। अभियानका वरिष्ठ अधिवक्ताहरू ध्रुवलाल श्रेष्ठ, युवराज कोइराला, हरि कटेल, निकेश धिताल, जग्गा रहेको चाँगुनारायण नगरपालिका वडा नं. १ का वडा अध्यक्ष सिजन कार्की, सो अभियानमा लामो समयदेखि निरन्तर लागिरहेका नेपाल मजदुर किसान पार्टीका भक्तपुर जिल्ला समितिका उपाध्यक्ष न्हुच्छेंभक्त फोजू, अभियानमा लागिरहेका स्थानीय गौरीमान सिंह थापालगायतको नेतृत्वमा रहेको टोलीले मागपत्र मालपोत प्रमुखलाई बुझाएको हो।