कोशीको बजेट विवाद सुल्झाउन ६ सदस्यीय कार्यदल गठन

विराटनगर । कोशी प्रदेश सरकारले ल्याएको आर्थिक वर्ष २०८३/८४ को बजेटलाई लिएर चर्किएको विवाद तत्कालका लागि मत्थर पार्ने प्रयासस्वरूप सत्तारूढ दल कांग्रेस र एमालेले अनौपचारिक रूपमा ६ सदस्यीय कार्यदल निर्माण गरेका छन्। कार्यदलले निकास निकाल्नेमा दुवै दल आशावादी छन्।

बजेट विनियोजनमा सन्तुलन नमिलेको र केही क्षेत्रमा मात्र बजेट केन्द्रित गरिएको भन्दै सत्तारूढ एमाले र कांग्रेसकै सांसदहरूले बजेट फेल गराउने चेतावनी दिएपछि प्रदेशसभा बैठक प्रभावित बन्दै आएको छ। असार ११ गते बस्ने भनिएको प्रदेशसभाको बैठक बजेट असहमति कै कारण स्थगित गरी असार १६ गतेका लागि सारिएको थियो।