मुख्य सामग्रीमा जानुहोस्

समाचार

देश

जलस्रोतमा धनी, सिँचाइमा गरिब

annapurnapost.com · Mon Aug 15 00:20:00 GMT 2022

धान रोप्ने मुख्य महिना असार र साउन हुन्। तर अझै पनि मुलुकका धेरै खेत बाँझै छन्। रोपिएका धानका बोटले पानी पाएका छैनन्। यस्तो किन भयो भने धानबाली लगाइने खेतसम्म सिँचाइ सुविधा अपुग छ। मुलुकभर २६ लाख हेक्टर खेतीयोग्य जमिन छ। त्यसमध्ये एक तिहाइमा मात्रै सिँचाइ सुविधा छ। जब कि खेतीयोग्य जमिनमध्ये ८० प्रतिशतमा मुख्यबाली धानखेती हुन्छ। धान नै मुख्य खाद्यबाली हो। त्यही धानका लागि सिँचाइ सुविधा छैन। जब कि मुलुक कृषिप्रधान हो। देशको अर्थतन्त्रमा योगदान गर्ने सबैभन्दा ठूलो क्षेत्र भनेकै कृषि हो। त्यसैले नै जुन वर्ष धान धेरै फल्छ, अर्थतन्त्र उकासिन्छ, नत्र टाक्सिन्छ। अझ सिँचाइ सुविधा नभएकै कारण राम्ररी पानी पर्‍यो र धान सप्रन पायो भने अर्थतन्त्र पनि राम्रो हुन्छ नत्र धानखेतमा जस्तै अर्थतन्त्रमा पनि सुक्खा लाग्छ। त्यसैले नेपालको अर्थतन्त्र मनसुनमा भर पर्छ भनिन्छ। सत्य पनि त्यस्तै छ।

राणाकालमै प्रधानमन्त्री चन्द्रशमशेरले १९८५ मा नहर बनाएर योजनाबद्ध सिँचाइको सुरुआत गरेका थिए। उनले त्यसरी व्यवस्थित सिँचाइ सुरु गरेको झन्डै सय वर्ष पुग्दैछ। तर खेतीयोग्य जमिन सबैमा सिँचाइ पुग्न सकेको छैन। दशकौंअघि सुरु भएका थुप्रै सिँचाइ आयोजना अझै पूरा भएका छैनन्। जस्तो बाँकेमा सिक्टा। कैलालीमा रानीजमरा कुलेरिया। यी त राष्ट्रिय गौरवकै आयोजना पनि हुन्। तर काम कति सुस्त र भ्रष्ट छ भने सिक्टामा अर्बाैं रुपैयाँ बगिसक्यो तर पानी बग्न सकेको छैन। भेरी बबई डाइभर्सनको काम पनि भनेको बेला सकिने छेकछन्द छैन। काम त आखिर यही राज्यकै हो। तर एउटा मन्त्रालयबाट भइरहेको काममा अर्काे मन्त्रालयबाट हुनुपर्ने प्रक्रिया पूरा हुन समय लागेको लाग्यै छ। रुख कटानसम्बन्धी प्रस्ताव वनमा अडकएको छ। यस्तो त नेपालमा जताततै हुन्छ। भेरी बबईमा पनि भएकै छ।

स्रोतमा पूरा पढ्नुहोस् (annapurnapost.com)