डिआइजिपी रनिङ फुटबलको उपाधि पुलिस स्कुल धरानलाई

सुनसरी । सातौँ संस्करण कोशी प्रदेश अन्तर विद्यालय डिआइजिपी रनिङ फुटबल प्रतियोगिता २०८२ को उपाधि आयोजक नेपाल पुलिस स्कुल धरान (रातो) ले जितेको छ ।

धरान उपमहानगरपालिका–१३ स्थित नेपाल प्रहरी प्रदेश कार्यालयको खेल मैदानमा शनिबार सम्पन्न फाइनल खेलमा नेपाल पुलिस स्कुलले प्रभात सेकेन्डरी बोर्डिङ स्कुल धरानलाई १–० गोलअन्तरले पराजित गर्दै उपाधि हात पारेको हो । पुलिस स्कुलका विकास मगरले पहिलो हाफको सातौँ मिनेटमा गोल गरेका थिए । टोली कप्तान समिर राईको पासमा डिबक्स बाहिरबाट गरेको उक्त गोल नै आजको फाइनल खेलको निर्णायक बन्यो । मगरले फाइनल खेलको ‘म्यान अफ दी म्याच’ घोषित हुँदै नगद रु एक हजार पाँच पुरस्कार प्राप्त गरे ।