माओवादी बैठकमा प्रचण्डको चर्को आलोचना

काठमाडौं । सरकारको नेतृत्व गरेको नेपाल कम्युनिस्ट पार्टी (माओवादी केन्द्र) को बुधबारदेखि चलेको केन्द्रीय समिति बैठकमा पार्टी अध्यक्ष पुष्पकमल दाहाल ‘प्रचण्ड’को चर्को आलोचना भएको छ । बैठकमा धारणा राख्ने अधिकांश युवा नेताहरूले अध्यक्ष ‘प्रचण्ड’को कार्यशैलीमाथि प्रश्न उठाउँदै नेतृत्वले नै गुटलाई प्रश्रय दिएको आरोप लगाएका छन् ।

बैठकमा पार्टीले स्वास्थ्य, शिक्षा, कृषि, रोजगार र जनजीविकाका सवालमा आफ्नो धारण बनाउन नसकेको भन्दै आलोचना भएको छ । केन्द्रीय सदस्य दिलीप प्रजापतिले पार्टीमा अराजकता हाबी हुँदै गएको भन्दै विधान मिच्ने काम अध्यक्ष प्रचण्डबाटै पनि भएको आरोप लगाउनुभयो । प्रजापतिले पार्टीमा रहेका दोहोरो भूमिका हटाउनसमेत माग गर्नुभएको छ । शहरमा पार्टी बनाउन संगठनात्मक संरचना नै फरक बनाइनुपर्ने भन्दै उहाँले पार्टी समाजिक सञ्जालको प्रयोगमा चुकिरहेको टिप्पणी गर्नुभयो । बैठकमा अर्का केन्द्रीय सदस्य हितबहादुर तामाङले पार्टी नेतृत्वको चाकडीका भरमा एकै व्यक्ति पटकपटक मन्त्री भइराख्ने प्रवृत्ति पार्टीमा हाबी हुँदै गएको भन्दै नेतृत्वको विरोध भइरहेको भन्दै नेतृत्व सच्चिन आवश्यक रहेको धारणा व्यक्त गर्नुभयो ।