सेती खोंचको जहाज दुर्घटनास्थलमा स्मारक बनाउन माग

पोखरा । स्थानीय तथा सरोकारवालाले सेती खोंचको जहाज दुर्घटनास्थलमा स्मारक बनाउन माग गरेका छन् । नेपालको आन्तरिक उडान इतिहासकै सबैभन्दा ठूलो विमान दुर्घटना माघ १ गते पोखरामा भएको थियो । उड्डयन क्षेत्रको उक्त विभीषिकाको भविष्यमा पनि अध्ययन, अनुसन्धान र मृतकहरुको सम्झनाका लागि दुर्घटनास्थलमा स्मारक निर्माणका लागि उनीहरुले माग गरेका हुन् ।

पोखरा अन्तर्राष्ट्रिय विमानस्थलमा अवतरण गर्ने क्रममा सेती नदी नजिकको खोंचमा चालक दलका ४ जना र ६८ यात्रुहरू गरी ७२ जना सवार विमान दुर्घटनामा परेको थियो । दुर्घटना प्रभावित नागरिक समाज गठन गरेर पोखरा महानगरपालिका र प्रदेश सरकारलाई उक्त क्षेत्रमा स्मारक बनाउन माग गरिने स्थानीय बासिन्दासमेत रहेका प्रेस स्वतन्त्रता सेनानी कुसुमकेशव पराजुली बताए । उनले माघ १३ गते शोकसभा साथै उक्त ठाउँमा मृतकको सम्झनामा पार्क बनाउन माग गरिने जनाए ।