काठमाडौँमा तीन दिने फिल्म फेस्टिभल आयोजना हुने

काठमाडौँ। काठमाडौँ महानगरपालिकाले यही कात्तिक १३, १४ र १५ गते फिल्म फेस्टिभल आयोजना गर्ने भएको छ। फेस्टिभलको शुभारम्भ कात्तिक १३ गते वसन्तपुरमा सम्पदा यात्राबाट गरिनेछ। कार्यक्रम अन्तर्गत राष्ट्रिय सभा गृह, नेपाल पर्यटन बोर्ड, जय नेपाल सिनेमा घर र तारागाउँमा विभिन्न कार्यक्रम सञ्चालन हुनेछन्।

महानगरपालिकाका अनुसार फेस्टिभलमा ४० वटा चलचित्र प्रदर्शन गरिनेछन्। यसमा सर्ट फिल्म भिडियो च्यालेञ्ज, नेपाल पानोरामा र इन्टरनेसनल पानोरामा समावेश छन्। शुभारम्भका अवसरमा नयाँसडक-जुद्ध शालिकदेखि इन्द्रचोकसम्मको सडकमा ‘भिडियो च्यालेञ्ज’बाट छानिएको लघु चलचित्र र पुरानो चलचित्र ‘सिन्दूर’ प्रदर्शन गरिनेछ। दर्शकका लागि फिल्म प्रदर्शन निःशुल्क हुनेछ र सिट रिजर्भका लागि निःशुल्क टिकट लिनुपर्ने व्यवस्था गरिएको छ।