हालान्डको गोल तर नर्वे स्तब्ध

ओस्लो । खेलको अन्त्यतिर दुई मिनेटको अन्तरमा दुई गोल गर्दै स्कटल्याण्डले नर्वेविरुद्ध उत्कृष्ट पुनरागमन गर्न सफल भएको छ । २–१ को जीत हासिल गर्दै स्कटल्याण्डले युरो २०२४ छनोटमा आफ्नो शत प्रतिशत विजय यात्रा कायमै राखेको हो ।

म्यानचेस्टर सिटीका स्ट्राइकर अर्लिङ हालान्डले ६१ औँ मिनेटमा पेनाल्टीबाट गोल गर्दै नर्वेलाई अग्रता दिलाएका थिए । यो सिजन उनको यो ५३ औँ गोल थियो । टोली जीततर्फ अघि बढिरहँदा खेलको ८७ औँ मिनेटमा लिन्डन डाइक्सले नर्वेको गल्तीको फाइदा उठाउँदै बराबरी गोल गरे ।