असन्तुलित जनसंख्या

जनसंख्याको सन्तुलन खल्बलिन नदिन बेलामा ध्यान पुर्‍याइएन भने दीर्घकालमा आपत् आइलाग्दा आश्चर्य मान्नुपर्ने छैन। तर, त्यो मुलुकका लागि दुर्भाग्य हुनेछ।

पानी ओरालो बग्छ। मानिस पनि अवसरको खोजीमा बगिरहन्छ। जता अवसर हुन्छ, त्यतै जान्छ मान्छे। जसरी पानी एकै ठाउँमा थुप्रिँदा ताल जम्छ वा सागर बन्छ, समुद्र बन्छ। मानिसहरू जम्मा हुँदै जाँदा सहर बन्छ। सहर बन्नु नराम्रो होइन तर जनसंख्याको थुप्रोमात्रै एकै ठाउँमा लाग्यो भने त्यसले सिर्जना गर्ने समस्या अनेक हुन सक्छन्। बसोबास व्यवस्थित बनाउनु निकै ठूलो चुनौतीपूर्ण काम हो। पछिल्लो समय नेपालको जनसंख्या पानी झैं आरोलो लागिरहेको छ। पहाड र हिमाली भेगबाट जनसंख्या तराई मधेसमा थुप्रिँदो छ। जसै जनसंख्या मधेस झर्दाे छ, पहाड र हिमालका घरहरू रित्तारित्ता र सुनसान हुँदैछन्। खेतबारी बाँझो बन्दैछन्। अनि तराईमा चाहिँ खेतीयोग्य जमिन मासिएर घडेरी बन्दैछन्।