जहाँबाट सुरु हुन्छ समृद्धिको वास्तविक यात्रा

राज्यको नीतिदेखि राजनीतिक दलको घोषणापत्रसम्म ‘समृद्ध नेपाल’ उल्लेख छ । अर्थात्, समृद्धि आम नेपालीको साझा लक्ष्य हो । तर, समृद्धिको अवधारणामाथि हुने बहस पर्याप्त वैचारिक स्पष्टतामा आधारित छैन । समृद्धिलाई लक्ष्यका रूपमा स्वीकार गरिए पनि त्यसको अर्थ, आधार र चरणबारे गम्भीर विमर्श भएकै छैन ।

भौतिक पूर्वाधार विस्तार र आर्थिक गतिविधिलाई समृद्धिको आधार मान्ने प्रवृत्ति छ । यस अवधारणाले सडक, भवन, उद्योग वा अन्य भौतिक संरचनाको विस्तारलाई समृद्धिको सूचक मान्छ । अर्थात्, भौतिक विकासलाई नै समृद्धि ठानिन्छ । तर, समृद्धिको प्रश्न यति सरल छैन ।