सुशासन र समृद्धिका लागि नेपालले लिनु पर्ने कूटनीतिक पहल

काठमाडौँ । शासकीय सुधार सम्बन्धी कार्यसूची अन्तर्गत आफ्नो क्षेत्राधिकारभित्रका विषयमा परराष्ट्र मन्त्रालयले विभिन्न कार्य अगाडि बढाएको छ । परराष्ट्र मन्त्रालयका प्रवक्ता एवं सहसचिव लोकबहादुर क्षेत्रीका अनुसार आर्थिक समृद्धि र सुशासनलाई मुख्य आधार बनाएर धमाधम काम भइरहेको छ । ‘दूतावासको पुनर्संरचना सम्बन्धी विषय आर्थिक समृद्धिसँग सम्बन्धित छ भने राजदूत नियुक्तिका लागि खुला विज्ञापन निकाल्नु सुशासनसँग सम्बन्धित विषय हो,’ उनले भने ।

आर्थिक भार कम गर्न भन्दै सरकारले त्यति उपयोगी नरहेका ठाउँका नियोगहरू बन्द गर्ने निर्णय गरेको छ भने केही वाणिज्य दूत कार्यालय खारेज गरेको छ । त्यसैगरी दलीय भागबन्डामा राजदूत नियुक्त गर्ने प्रचलनलाई हटाउने भन्दै सरकारले खुला विज्ञापनमार्फत आवेदन आह्वान गरेको छ ।