एनआरएनएले अझै दिएन प्रशिक्षकको भत्ता, पदकधारी खेलाडीको हात पनि रित्तै

काठमाडौं । गत वर्ष गण्डकी प्रदेशमा भएको नवौं बृहत् राष्ट्रिय खेलकुद प्रतियोगितामा सहभागी गैरआवासीय नेपाली संघ (एनआरएनए) टोलीका प्रशिक्षकले पाउनुपर्ने भत्ता र पदकधारी खेलाडीले पाउनुपर्ने नगद पुरस्कार अझै नपाएको कुरा बाहिरिएको छ । एनआरएनएले नवांै राष्ट्रिय खेलकुद प्रतियोगिताका क्रममा गरेको सम्झौताअनुसार उपलब्ध गराउनुपर्ने प्रशिक्षक भत्ता र पुरस्कार अहिलेसम्म नपाएको खेलाडी र प्रशिक्षकहरूले बताएका छन् ।

राष्ट्रिय खेलकुद परिषद्मा माग भएबमोजिम काजमा खटिएका तीनसहित विभिन्न खेलका एक दर्जनभन्दा बढी प्रशिक्षकलाई एनआरएनएले अझै भत्ता नदिएको पीडित प्रशिक्षकहरूले बताएका हुन् । एनआरएनए स्पोर्ट्स एकेडेमीको खेल नियमावली एवं कार्यविधि र खेलाडीहरूले पाउने सुविधा तथा राष्ट्रिय समन्वय परिषद्ले खेल्नुपर्ने भूमिका २०७९ को अनुच्छेद–३ को (ङ) मा पदकधारी खेलाडीलाई नगद पुरस्कार दिइने भनेर प्रस्ट उल्लेख भए पनि प्रतियोगिता सम्पन्न भएको सात महिना बितिसक्दा पनि व्यवहारमा लागू हुन सकेको छैन । यो विषयमा पटकपटक सम्बन्धित व्यक्तिलाई जानकारी गराउँदा पनि समस्या जस्ताको तस्तै रहेपछि प्रशिक्षक र खेलाडीहरू पीडित बनेका छन् ।