न्यालु लेकमा हिउँ पन्छाउने काम रोकियो, लिमीवासीको आवागमनमा सकस

सुर्खेत। हिमपातका कारण अवरुद्ध बनेको हुम्लाको नाम्खा गाउँपालिका–६ स्थित लिमी जाने सडक खुलाउने काम अधुरै रोकिएको छ। न्यालु लेकमा जमेको हिउँ पन्छाउन केही दिन जेसीबी परिचालन गरिए पनि लिमीतर्फको सडकमा हिउँ नहटाउँदै काम रोकिएको हो। यसले हिमालपारिको लिमी क्षेत्रको आवागमन सहज बनाउने प्रयासमा थप समस्या सिर्जना गरेको छ।

केही दिनअघि सल्ली हुँदै गएको जेसीबीले सेलिवाङ दहबाट हिउँ पन्छाउने काम गरेको थियो। न्यालु लेकबाट सिमकोटतर्फको सडकमा जमेको हिउँ हटाइए पनि लिमीतर्फको सडकमा भने हिउँ पन्छाउने काम पूरा हुन सकेन। न्यालु लेकको सडकमा तीनदेखि पाँच फिटसम्म हिउँ जमेको लिमीका वडाध्यक्ष पाल्जोर तामाङले बताए।