विकास निर्माणलगायत विषयमा उम्मेदवारका प्रतिबद्धता

गण्डकी । चुनावको मिति नजिकिँदै गर्दा कास्कीमा उम्मेदवारहरूले विकासका प्रतिबद्धतासहित घरदैलोमा पुग्ने कामलाई तीव्रता दिएका छन् । मतदाता भेटघाटका क्रममा उम्मेदवारहरूले नयाँ पुस्ताले उठाएको सुशासनको मुद्दासहित समृद्धि, विकासलगायतका विषयमा प्रतिबद्धता व्यक्त गरेका छन् ।

कास्की क्षेत्र नं १ मा नेकपा (एमाले) का तर्फबाट प्रतिनिधिसभा सदस्य उम्मेदवार बैनबहादुर अधिकारी क्षेत्रीले पर्यटनको राजधानी पोखरामा ठूलो सङ्ख्याका सहभागी अट्ने कार्यक्रम गर्ने हल वा सम्मेलन केन्द्र नहुँदा सहभागी धेरै भएमा खुल्ला चौरमा कार्यक्रम गर्नुपर्ने बाध्यता रहेको बताउँदै आफूले जितेपछि पोखरामा अन्तर्राष्ट्रिय सम्मेलन केन्द्र निर्माण गर्न पहल गर्ने बताए । पोखरा महानगरपालिका–२६ का मतदातासँग आइतबार भेटघाटका क्रममा उनले अन्तर्राष्ट्रिय सम्मेलन केन्द्र सिलिङेमा बनाउने बताए ।