बेलायतमा नर्स पठाउन प्रोटोकलको खाका तयार, कस्ता नर्स जान पाउँछन् ?

काठमाडौं । रोजगारीका लागि बेलायतमा नेपाली नर्स पठाउनका लागि सरकारले इम्प्लिमेन्टेसन प्रोटोकलको खाका तयार पारेको छ । श्रम रोजगार तथा सामाजिक सुरक्षा मन्त्रालयले नर्सहरूको योग्यता, सुविधा र पठाउने प्रक्रियाबारे प्रोटोकलको खाका तयार परेर सम्बन्धित मन्त्रालयहरूमा राय सुझावका लागि पठाएको जनाएको छ ।

"हामीले मुख्यगरी योग्यता, सुविधा र पठाउने प्रक्रियालाई समेटेर प्रोटोकलको खाका तयार पारेका छौँ । तर, यसमा हाम्रो मात्रै निर्णयले नहुने भएकाले राय सुझाव र सहमतिका लागि स्वास्थ्य, कानुन र पराष्ट्र मन्त्रालयमा पठाइएको छ," श्रम मन्त्रालयका रोजगार व्यवस्थापन महाशाखा प्रमुख राजीव पोखरेलले भने ।