महासंघका वरिष्ठ नेता र अभियन्ताले नै डुबाए सहकारी

विराटनगर । मोरङको कटहरी गाउँपालिकामा दर्ता रहेको विराट कृषि उत्पादन तथा बजारीकरण विशिष्टीकृत सहकारी संघ संकटग्रस्त अवस्थामा पुर्याउने भूमिकामा सहकारीका अभियन्ता र सहकारी महासंघका केन्द्रीय नेताहरुकै संलग्नता देखिएको छ ।

उक्त सहकारी संघको १ करोड ३ लाख रुपैयाँ जोखिममा छ । उक्त सहकारी संघको सल्लाहकारमा रहेका रमेश प्रसाद पोखरेल स्टार बहुउद्देश्यीय सहकारी संस्था लि.का सञ्चालक हुन् । पोखरेल केही महिना अगाडि सम्पन्न राष्ट्रिय सहकारी महासंघको भेलाबाट वरिष्ठ उपाध्यक्षमा चयन भएका छन् । उनको सहकारीले विशिष्टीकृतमा ४ लाख रुपैयाँ लगानी गरेको छ । विशिष्टीकृत सहकारी गठन गर्ने बेलामा पनि उनै पोखरेलले पहल गरेका थिए ।