सिमलताल दुर्घटनाः पाँच दिनदेखि अहोरात्र खोजी

काठमाडौं । नारायणगढ–मुग्लिन सडक खण्डअन्तर्गत भरतपुर महानगरपालिका–२९ सिमलतालमा गएको पहिरोमा परेर शुक्रबार बिहानदेखि त्रिशूली नदीमा हराएकाहरूको पाँच दिनदेखि सशस्त्र प्रहरी, नेपाली सेना र प्रहरीले खोजी गरिरहेका छन् ।

मंगलबारसम्म हराइरहेकामध्ये १७ जनाको शव भेटिएको छ । जसमध्ये १० जनाको सनाखत भएको जिल्ला प्रशासन कार्यालय चितवनले जनाएको छ । हराइरहेकाहरूको खोजीमा पानीभित्रका वस्तुहरूको संकेत दिने उपकरण ‘सोनार क्यामेरा’ प्रयोग गरेर त्रिशूलीमा शुक्रबारदेखि हराइरहेका दुई बससँगै यात्रुको खोजी सुरु भएको छ । बेपत्ताको खोजीका लागि सशस्त्र प्रहरीको मुख्यालयबाट इन्जिनियरसहितको प्राविधिक टोली खटाइएको छ ।