गरिबी र अभाव झेलिरहेको ‘बालुवाटार’

‘बालुवाटार’ भन्नासाथ मुलकको कार्यकारी प्रमुखको सरकारी निवास भन्ने बुझिन्छ । तर यहाँ अभाव र गरिबीलाई वर्षौंदेखि झेल्दै आएको ‘बालुवाटार’को चर्चा गर्न लागिएको हो जो सुर्खेत उपत्यकामा पर्दछ ।

सुर्खेत उपत्यकाको पूर्वी क्षेत्रमा झुप्रा खोला बग्छ । त्यो खोलाले वीरेन्द्रनगर र लेकवेशी नगरपालिकाको सीमाना छुट्याउँछ । त्यही खोलावारीको सानो बस्ती हो– सुर्खेत उपत्यकाको बालुवाटार । वीरेन्द्रनगर–११ मा पर्ने यो बालुवाटार बस्तीका बासिन्दा आफ्नो दैनिकी गुजार्न वर्षौंदेखि निकै संघर्ष गर्दै आएका छन् ।