चार दशक : थोरै हाँसो धेरै सकस

श्रद्धेय पाठक वर्ग, यहाँहरूलाई विदितै छ, नेपालमा निरन्तर चल्दै आएको निजी मिडियामा सबैभन्दा जेठो कामना समूह नै हो । यो २०४१ सालदेखि तपाईंहरूको सेवामा समर्पित छ । पाँच हजारको पुँजीबाट शुरू भएको यो संस्थाले आज भौतिक सफलता कति हासिल ग¥यो, त्यो महत्वपूर्ण छैन– तपाईंजस्ता लाखौं पाठकको मन जितेको छ, त्यो अनमोल छ । चार दशक अघिको पाँच हजार अहिले पचासौं अर्बको माया र सद्भावमा रूपान्तरित भइसकेको छ ।

यो पचासौं अर्बको माया हाम्रो अनुभव हो– कामना परिवारको अनुभूति । हाम्रो मनको भाषा । प्रकाशन गृहका परिवारका सदस्यको भाषा । यस परिवारमा को छन् भन्ने कुरा त महत्वपूर्ण छ नै, साथमा को थिए र को हुन सक्छन् भन्ने पनि उत्तिकै महत्वपूर्ण छ । स्वर्गीय पुष्करलाल श्रेष्ठको भिजनबाट शुरू भएको यस परिवारमा विगत चार दशकमा हजारौं व्यक्ति जोडिए, उनीहरूका लागि प्रत्यक्षतः यही संस्थाले जीविकोपार्जनको स्रोतको भूमिका खेल्यो । त्यत्तिकै संख्यामा पत्रकार र कर्मचारीले पेसागत पहिचान पनि बनाए । आज नेपालका ७७ रै जिल्लामा कामनासँग प्रत्यक्ष–परोक्ष आबद्ध व्यक्ति हुनुहुन्छ । जीवनको कुनै कालखण्डमा उनीहरूले कामना परिवारको सदस्य बन्ने र यस संस्थालाई बनाउने भूमिका खेलेका छन् । यसर्थ आज कामना न्यूज पब्लिकेसन्स प्रालि नामको यो संस्था पुष्करलालबाट विस्तारित भएर देशव्यापी पुष्पवाटिका बनेको छ । यस संस्थाको प्रगति र प्रतिष्ठा लाखौं नेपाली नागरिकको गौरवको विषय भएको छ । यो हाम्रो अन्तर मनको विश्वास हो ।