पौवादुङमा भोजपुरको पहिलो बालश्रम मुक्त स्थानीय तह घोषणा

भोजपुर । पौवादुङमा गाउँपालिकालाई जिल्लाकै पहिलो बालश्रम मुक्त स्थानीय तह घोषणा गरिएको छ । यहाँका छ वटै वडालाई बालश्रम मुक्त घोषणा गरिएसँगै गाउँपालिकालाई सरोकारवाला पक्षको उपस्थितिमा आइतबार बालश्रम मुक्त घोषणा गरिएको हो । भोजपुरका नौ वटा स्थानीय तह मध्ये बालश्रम मुक्त घोषणा गर्ने पहिलो स्थानीय तह बनेको हो । घोषणासँगै पौवादुङमा कोशी प्रदेशमा बालश्रम मुक्त घोषणा गर्ने दोश्रो र नेपालकै छैटौँ स्थानीय तह बनेको छ ।

श्रम रोजगार तथा सामाजिक सुरक्षा मन्त्रालय, विश्वश्रम संगठनको एआर सी प्रोजेक्ट र गाउँपालिकाको सहकार्यमा बालश्रम मुक्त घोषणा गरिएको हो । गाउँपालिकाले विश्वश्रम संगठनसँग सम्झौता गरेर दुई वर्षअघिबाट बालश्रम मुक्त घोषणाका लागि काम थालनी गरेको थियो । घोषणाको लागि प्रत्येक वडामा गणकहरु खटाएर तथ्याङ्क संकलन गर्दा बालबालिकाहरु बालश्रममा नरहेको पाइएपछि गाउँपालिकालाई बालश्रम मुक्त घोषणा गरिएको हो ।