प्रेस स्वतन्त्रतामाथि न्यायिक ‘तरबार’ : क्षेत्राधिकार मिचेर किन हुँदैछन् समाचार हटाउने आदेश ?

विद्युतीय सवारी साधन बीवाइडीको आधिकारिक विक्रेता साइमेक्स इंक र बिजनेस न्युज डटकमबिचको विवादमा काठमाडौँ जिल्ला अदालतले दिएको पछिल्लो आदेशलाई नेपाल पत्रकार महासंघले ‘न्यायिक सक्रियताको नाममा प्रेस स्वतन्त्रतामाथिको प्रहार’ र ‘क्षेत्राधिकारको उल्लङ्घन’ भनेको छ ।

जिल्ला अदालतका न्यायाधीश जगतबहादुर पौडेलको इजलासले ६६ वटा समाचार हटाउन आदेश दिएको थियो । नेपालको संविधानको धारा १९ ले सञ्चारको हक अन्तर्गत ‘कुनै समाचार, लेख वा अन्य कुनै पाठ्य सामग्री मुद्रण वा प्रकाशन गरेबापत त्यस्तो सामग्री प्रकाशन, प्रसारण वा छापिने छापाखाना वा अन्य कुनै विद्युतीय माध्यमलाई बन्द, जफत वा दर्ता खारेज गरिने छैन’ भन्ने व्यवस्था गरेको छ ।