संसद् छिर्न सातौँ पटक चुनावी मैदानमा रिजाल, चुनौती बन्दैछन् पूर्व प्रधानपञ्च मियाँ

वीरगंज : पर्साको क्षेत्र नम्बर ४ मा सत्तारुढ पाँच दलीय गठबन्धनका उम्मेदवार नेपाली कांग्रेसका रमेश रिजाल र नेकपा एमाले-जनता समाजवादी पार्टी (जसपा) गठबन्धनका उम्मेदवार जालिम मियाँ मन्सुरी दुवै जनाको लामो राजनीतिक पृष्ठभूमि छ। पञ्चायती व्यवस्थादेखि स्थानीय तह केन्द्रित राजनीति गरेका मन्सुरी र केन्द्रीय राजनीतिमा सक्रिय रहेका रिजालबिचको प्रतिस्पर्धा रोचक बन्ने देखिएको छ।

निर्वाचनमा ३ पटक जित र ३ पटक हार व्यहोरिसकेका रिजाल ६५ वर्षका पुगे। २०४८ सालदेखि लगातार चुनाव लड्दै उनले २०४८, २०५१ र २०६४ को चुनाव जितेका थिए भने २०५६, २०७० र २०७४ मा पराजय भोगेका थिए। २०७४ को प्रतिनिधिसभा सदस्यको निर्वाचनमा उनी मधेशी मोर्चाका साझा उम्मेदवार लक्ष्मणलाल कर्णसँग पराजित भएका थिए।