सोमबारको भूकम्पमा थप १३ जना घाइते, जाजरकोट र रुकुम पश्चिममा कति भए राहत वितरण ? [विवरणसहित]

शुक्रबारको शक्तिशाली भूकम्पपछि सोमबार फेरि आएको अर्को झट्काले थप १३ जना घाइते भएका छन् । गृह मन्त्रालयले ५.८ म्याग्निच्युडको सोमबारको परकम्पनबाट रुकुम पश्चिममा ११ र जाजरकोटमा २ जना घाइते भएको जनाएको छ । सोमबार दिउँसोको परकम्पको केन्द्रबिन्दु पनि जाजरकोट नै रहेको राष्ट्रिय भूकम्प मापन केन्द्रले जनाएको छ ।

गृह मन्त्रालयका प्रवक्ता नारायण प्रसाद भट्टराईले जारी गरेको विज्ञप्तिमा शुक्रबार जाजरकोटको बारेकोट केन्द्रबिन्दु भई गएको भूकम्पबाट हालसम्म १५३ जनाको मृत्यु भएको उल्लेख छ। यस पूर्व सो घटनाबाट मृत्यु भएको सङ्ख्या १५७ उल्लेख भएकोमा ४ जनाको दोहोरो विवरण परेकोले सो सङ्ख्या हटाइएको उनले बताए।