केराखेतीमा उठेन लगानी

गुलरिया : कडा परिश्रम र लगानीले उत्पादन गरेको केराले बजार नपाएपछि गुलरिया नगरपालिकास्थित खैरीका केरा किसान दीर्घबहादुर खत्री दुःखी छन्। स्वदेशमै केही गरौं भनी वैदेशिक रोजगारीमा नगई गरेको केरा खेती उत्पादन त भयो तर बजार र मूल्य नपाउँदा कृषि पेसाप्रति नै मन मरेर गयो। आम्दानीको के कुरा। लगानी नै नउठ्ने उनको चिन्ता छ।

केरा कृषक खत्रीले भने, ‘बल्लतल्ल ऋण लिएर केरा खेती गरेँ तर बजार मिलेन। अब बैंकको ब्याज कसरी तिर्ने ? फाट्टफुट्ट स्थानीय बजारमा केरा बेचे पनि लगानीअनुसारको मूल्य पाइँदैन। केरा खेती मासेर अर्कै व्यवसाय गर्ने सोचमा छु। फेरि वैदेशिक रोजगारी नै ताक्नु पो पर्छ कि,’ पुराना दिन सम्झँदै उनले पीडा पोखे, ‘केरा खेतीबाट धेरै आम्दानी गर्छु भन्ने विचार थियो तर सफलता हात लागेन।’