परम्परागत खेती छाडेर किवीतर्फ आकर्षित हुँदै किसान

मकै, कोदो र आलु खेती हुँदै आएका सिन्धुलीको सुनकोसी गाउँपालिका-७ नागीका डाँडापाखा यतिबेला किवीका बोटले हरियाली देखिन थालेका छन्।

बजारमा किवीको माग बढ्नुका साथै उचित मूल्य पाउन थालेपछि यहाँका किसान परम्परागत खेती छाडेर व्यावसायिक किवी खेतीतर्फ आकर्षित भएका हुन्। सुनकोसी गाउँपालिकाको महाभारत क्षेत्रमा पर्ने नागीको हावापानी र माटो किवी खेतीका लागि अनुकूल भएपछि किसानले खेतबारीसँगै पाखो जमिनमा समेत किवीका बिरुवा लगाउन थालेका छन्। परम्परागत खेतीबाट अपेक्षित आम्दानी लिन कठिन भइरहेका बेला किवी खेतीबाट तुलनात्मक रूपमा राम्रो आम्दानी गर्न सकिने भएपछि किसानको आकर्षण बढ्दै गएको हो।