प्रेरक प्रसंग : रणजित सिंह र वृद्धा

एकपटक महाराज रणजित सिंह कतै जाँदै थिए । अचानक कतैबाट बत्तिएर आएको एउटा इँटाको ठूलै टुक्रा उनको खुट्टामा लाग्यो । उनले आफूमाथि कसले किन इँटा प्रहार गर्‍यो भन्ने अनुमान लगाउन सकेनन् । सिपाहीले चारैतिर हेर्दा एक वृद्धा देखे । उनीहरूले तिनैलाई गिरफ्तार गरी महाराजसामु पेस गरे ।

राजालाई देखेपछि ती वृद्धा थरथर काम्न थालिन् । राजाले केही भन्नुभन्दा पहिल्यै उनले हात जोडेर भनिन्– महाराज मेरो नाति दुई दिनदेखि भोको थियो । उसलाई खुवाउन म बयरको रुखमा इँटा प्रहार गरिरहेकी थिएँ । तर, गल्तीले गर्दा हजुरलाई लाग्यो । मलाई माफ गर्नुहोस् महाराज !