३५ हजार बालबालिकालाई सदस्यता दिएको रास्वपालाई मानव अधिकार आयोगले सोध्यो प्रश्न

काठमाडौं । १८ वर्षभन्दा मुनिका बालबालिकालाई दलको सदस्यता वितरण गरेको भन्दै राष्ट्रिय मानव अधिकार आयोगले राष्ट्रिय स्वतन्त्र पार्टी (रास्वपा) सँग स्पष्टीकरण माग गरेको छ । आयोगले असार १५ गते नै पत्र लेख्दै यसबारे विस्तृत जानकारी उपलब्ध गराउन रास्वपालाई निर्देशन दिएको हो ।

आयोगका सहायक प्रवक्ता एवं उपसचिव श्यामबाबु काफ्लेका अनुसार सञ्चारमाध्यममा आएका समाचार र रास्वपाको महाधिवेशनमा प्रस्तुत प्रतिवेदनका आधारमा आयोगको गम्भीर ध्यानाकर्षण भएको हो । आयोगले ‘राष्ट्रिय मानव अधिकार आयोग ऐन, २०६८’ को दफा २१(१) बमोजिम बालबालिकालाई सदस्यता वितरण गरिएको हो वा होइन भन्नेबारे यथाशीघ्र जवाफ पठाउन पत्राचार गरेको छ ।