पीसीएल नर्सिङबारे अदालतको आदेश सच्याउन डा. गोविन्द केसीको माग, अन्यथा आन्दोलनको चेतावनी

काठमाडौं- वरिष्ठ चिकित्सक प्राडा. गोविन्द केसीले पीसीएल नर्सिङ कार्यक्रम सञ्चालनसम्बन्धी उच्च अदालत पाटनको आदेश कार्यान्वयन गर्न सर्वोच्च अदालतको फैसला कार्यान्वयन निर्देशनालयले दिएको निर्देशनप्रति गम्भीर असहमति जनाउँदै उक्त निर्णय शिक्षा ऐनविपरीत रहेको बताएका छन्।

बुधबार जारी प्रेस विज्ञप्तिमा डा. केसीले ‘पीसीएल नर्सिङ कार्यक्रम सञ्चालनको कानुनी बाटो खुला, निजी मेडिकल कलेजमा २ हजार विद्यार्थी थपिने’ भन्ने समाचारप्रति आफ्नो गम्भीर ध्यानाकर्षण भएको उल्लेख गरेका छन्। उनले शिक्षा ऐनको आठौँ संशोधन (२०७३) अनुसार कक्षा १२ सम्मको शिक्षा स्कुले शिक्षाअन्तर्गत परेकाले एसईईपछि सञ्चालन हुने पीसीएल नर्सिङलगायतका कार्यक्रम विश्वविद्यालय तथा मेडिकल कलेजबाट हटेर सीटीईभीटी मातहत सञ्चालन हुँदै आएको स्मरण गराएका छन्।