डि गेयाको गल्तीमा वेस्ट हामसँग जिल्लियो युनाइटेड

काठमाडौं । हालसम्म २० पटक उपाधि जितिसकेको म्यानचेस्टर युनाइटेडले जारी सिजनको इङ्लिस प्रिमियर लिग फुटबलमा भने अर्को खराब नतिजा ब्यहोरेको छ । आइतबार राति खेलिएको खेलमा वेस्ट हाम युनाइटेडले म्यानचेस्टर युनाइटेडलाई १—० गोलले हरायो ।

वेस्ट हामको जितमा सइद बेनरहमा नायक बने भने युनाइटेडका गोलकिपर डेभिड डि गेया खलनायक । डि गेयाको गल्तीको फाइदा उठाउँदै बेनरहमाले खेल सुरु भएको २७औँ मिनेटमा गोल गर्दै घरेलु समर्थकलाई खुसी बनाए । हारका बाबजुद म्यानचेस्टर युनाइटेड अङ्क तालिकाको चौथो स्थानमा यथावत् छ ।