मागेकै मन्त्रालय पाएका महावीर पुन

काठमाडौं : स्वतन्त्र उम्मेदवारका रूपमा निर्वाचन जितेका महावीर पुन पनि दोस्रोपटक मन्त्री बनेका छन्। जेन–जी आन्दोलनपछि गठित सुशीला कार्की नेतृत्वको सरकारमा पुन शिक्षा, विज्ञान तथा प्रविधिमन्त्री बनेका थिए। तर, निर्वाचनमा उम्मेदवार बन्नका लागि उनले पदबाट राजीनामा दिएका थिए।

विगतदेखि नै विज्ञान तथा प्रविधि मन्त्रालयलाई छुट्टै बनाउनुपर्ने माग राख्दै आएका पुनको चाहनाअनुसार नै सरकारले मन्त्रालयहरूको कार्यविभाजन हेरफेर गरी १८ वटा मन्त्रालय कायम गर्दा नयाँ विज्ञान तथा नवप्रवर्तन मन्त्रालय स्थापना गरेको हो। उनलाई सोही मन्त्रालयको जिम्मेवारी दिइएको छ। राष्ट्रिय आविष्कार केन्द्र सञ्चालन गरिरहेका पुन पछिल्लो समय आफ्नो आत्मकथा बिक्री गर्दै देश दौडाहामा निस्किएर चर्चामा रहेका थिए। मन्त्री पुनले पदभार ग्रहण गर्दै आफू पूरा समय पदमा नबस्ने घोषणा गरेका छन्।