चुमनुब्री स्याउ, किसानको घरमै थन्कियो

गोरखा : गोरखा चुमनुब्रीको स्याउका लागि भारत, चीन, जापान, अमेरिका र स्विट्जरल्यान्डबाट उच्च माग भइरहेको छ। तर, विदेश त परै जाओस, स्वदेशी बजारमा पनि स्याउ पुग्न सकेको छैन। ढुवानी गर्न नपाई सित्तैमा खेर जाने हो कि भन्ने चिन्ता किसानलाई छ।

२७ सय मिटर उचाइमा फल्ने गरेको ‘चुमनुब्री स्याउ’ रसिलो र स्वादिलो मानिन्छ। किसानका अनुसार यो स्याउमा औषधिको प्रयोग हुँदैन, केवल रासायनिक मल मात्रै हाल्ने गरिन्छ। चुमनुब्री गाउँपालिका–४ नाम्रुङस्थित स्याउबारीको १२ हजारवटा बोटमा फलेको स्याउ टिपेर घरमै थन्क्याएर राखेको लाक्पाडुण्डुप लामाले जानकारी दिए।