सेबोनको १० लाखको कारोबारसम्बन्धी निर्देशन नयाँ होइन, लगानीकर्ता किन त्रसित?

दसैँको मुखैमा नेपाल धितोपत्र बोर्ड (सेबोन) ले सम्पत्ति शुद्धीकरण तथा आतङ्ककारी कार्यमा वित्तीय लगानी निवारणसम्बन्धी निर्देशन, २०८३ लागू गरेको छ। बोर्डले असोज ३० गतेदेखि लागू हुने गरी जारी गरेको यो निर्देशनपछि सेयर बजारमा कारोबार गर्ने लगानीकर्तामाझ विभिन्न प्रश्न र आशङ्का देखिएका छन्। विशेषगरी एकै दिनमा १० लाख रुपैयाँ वा सोभन्दा बढीको सेयर कारोबार गर्ने लगानीकर्ताले आफ्नो कारोबारको विवरण दिनुपर्ने र रकमको स्रोत खुलाउनुपर्ने व्यवस्थालाई लिएर सामाजिक सञ्जालमा चर्चा भइरहेको छ।

नयाँ निर्देशन सार्वजनिक भएपछि कतिपय लगानीकर्ताले ठूलो रकमको सेयर कारोबार गर्न नहुने हो कि, आफ्नो आम्दानीको स्रोत प्रमाणित गर्न नसके समस्या पर्ने हो कि वा अब सेयर बेच्दा र किन्दा थप झन्झट बेहोर्नुपर्ने हो कि भन्ने प्रश्न उठाइरहेका छन्। सामाजिक सञ्जालमा भएका कतिपय व्याख्याले यो व्यवस्थालाई नयाँ र असाधारण कदमका रूपमा प्रस्तुत गर्दा लगानीकर्ताको अन्योल झनै बढेको देखिन्छ।